ਜਲੰਧਰ : ਜਲੰਧਰ ਵਿਖੇ ਨਕੋਦਰ ਰੋਡ ‘ਤੇ ਹੋਟਲ ਡਾਊਨਟਾਊਨ ਨੇੜੇ ਭਿਆਨਕ ਸੜਕ ਹਾਦਸਾ ਵਾਪਰ ਗਿਆ। ਇਹ ਹਾਦਸਾ ਡਾਊਨ ਟਾਊਨ ਹੋਟਲ ਨੇੜੇ ਇਕ ਆਟੋ ਦੇ ਗਲਤ ਦਿਸ਼ਾ ਵਿੱਚ ਜਾਣ ਕਾਰਨ ਵਾਪਰਿਆ। ਹਾਦਸੇ ‘ਚ ਆਟੋ ਚਾਲਕ ਸਮੇਤ ਕਾਰ ‘ਚ ਸਵਾਰ 4 ਲੋਕ ਜ਼ਖ਼ਮੀ ਹੋ ਗਏ ਹਨ, ਜਿਨ੍ਹਾਂ ਨੂੰ ਹਸਪਤਾਲ ‘ਚ ਦਾਖ਼ਲ ਕਰਵਾਇਆ ਗਿਆ ਹੈ। ਆਟੋ ਚਾਲਕ ਦੀ ਹਾਲਤ ਗੰਭੀਰ ਦੱਸੀ ਜਾ ਰਹੀ ਹੈ।
ਜਾਣਕਾਰੀ ਅਨੁਸਾਰ ਕਾਰ ਸਵਾਰ ਇਕ ਵਿਆਹ ਸਮਾਗਮ ਤੋਂ ਵਾਪਸ ਆ ਰਹੇ ਸਨ। ਆਟੋ ਵਿੱਚ ਇਕ ਯਾਤਰੀ ਵੀ ਸੀ, ਜਿਸ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਏਅਰ ਬੈਗ ਖੁੱਲ੍ਹਣ ‘ਤੇ ਕਾਰ ਚਾਲਕ ਦਾ ਬਚਾਅ ਹੋ ਗਿਆ ਪਰ ਹਾਦਸਾ ਇੰਨਾ ਭਿਆਨਕ ਸੀ ਕਿ ਟੱਕਰ ਤੋਂ ਬਾਅਦ ਕਾਰ ਦੀ ਪਿਛਲੀ ਸੀਟ ‘ਤੇ ਬੈਠੀ ਔਰਤ ਕਾਰ ਦੇ ਸਾਹਮਣੇ ਆ ਗਈ ਅਤੇ ਸ਼ੀਸ਼ੇ ਨਾਲ ਟਕਰਾ ਗਈ।
