ਸ਼ਾਹਪੁਰਕੰਢੀ ’ਚ ਮੁੜ ਧਮਾਕੇ ਸੁਣੇ
ਪਠਾਨਕੋਟ :”ਭਾਵੇਂ ਭਾਰਤ-ਪਾਕਿਸਤਾਨ ਦੀ ਜੰਗਬੰਦੀ ਹੋ ਚੁੱਕੀ ਹੈ ਪਰ ਇਸ ਦੇ ਬਾਵਜੂਦ ਵੀ ਰਣਜੀਤ ਸਾਗਰ ਡੈਮ ਵਾਲੇ ਪਾਸੇ ਸ਼ਾਹਪੁਰਕੰਢੀ ਖੇਤਰ ਵਿੱਚ ਸਵੇਰੇ ਦੋ ਧਮਾਕੇ ਸੁਣਨ ਨੂੰ ਮਿਲੇ। ਸਥਾਨਕ ਲੋਕਾਂ ਅਨੁਸਾਰ, ਇਹ ਧਮਾਕੇ ਪਹਿਲਾਂ ਹੋਏ ਧਮਾਕਿਆਂ ਵਰਗੇ ਹੀ ਸਨ। ਇਸ ਤੋਂ ਪਹਿਲਾਂ ਲੰਘੀ ਰਾਤ ਕਰੀਬ 9 ਵਜੇ ਮਾਧੋਪੁਰ ਅਤੇ ਮਾਮੂਨ ਮਿਲਟਰੀ ਸਟੇਸ਼ਨ ਵੱਲ ਵੀ ਧਮਾਕਿਆਂ ਦੀਆਂ ਆਵਾਜ਼ਾਂ ਸੁਣੀਆਂ ਗਈਆਂ ਸਨ ਅਤੇ ਦੋਵਾਂ ਸਥਾਨਾਂ ’ਤੇ 4 ਡਰੋਨ ਵੀ ਦੇਖੇ ਗਏ। ਪਾਕਿਸਤਾਨ ਵੱਲੋਂ ਭੇਜੇ ਗਏ ਡਰੋਨ ਕਿੱਥੇ ਡਿੱਗੇ, ਇਹ ਪਤਾ ਲਗਾਉਣ ਲਈ ਪੁਲੀਸ ਵੱਲੋਂ ਸ਼ਾਹਪੁਰਕੰਢੀ ਲਾਗੇ ਰਾਵੀ ਦਰਿਆ ਕਿਨਾਰੇ ਜੰਗਲਾਂ ਵਿੱਚ ਤਲਾਸ਼ੀ ਮੁਹਿੰਮ ਚਲਾਈ ਜਾ ਰਹੀ ਹੈ। ਮਾਮੂਨ ਦੇ ਛਤਵਾਲ ਪਿੰਡ ਵਿੱਚ ਰਹਿਣ ਵਾਲੇ ਲੋਕਾਂ ਅਨੁਸਾਰ, ਡਰੋਨਾਂ ਵਿੱਚੋਂ ਚਿੱਟੇ ਰੰਗ ਦੀਆਂ ਲਾਈਟਾਂ ਦਿਖਾਈ ਦੇ ਰਹੀਆਂ ਸਨ ਅਤੇ ਫੌਜ ਉਨ੍ਹਾਂ ਨੂੰ ਹਵਾ ਵਿੱਚ ਤਬਾਹ ਕਰਨ ਲਈ ਹਮਲਾ ਕਰ ਰਹੀ ਸੀ। ਬਹੁਤ ਸਾਰੇ ਲੋਕ ਆਪਣੇ ਘਰਾਂ ਦੀਆਂ ਛੱਤਾਂ ’ਤੇ ਚੜ੍ਹ ਕੇ ਇਸ ਕਾਰਵਾਈ ਨੂੰ ਦੇਖਣ ਲੱਗ ਪਏ।
ਜ਼ਿਕਰਯੋਗ ਹੈ ਕਿ ਸ਼ਾਹਪੁਰਕੰਢੀ ਦੇ ਰਾਵੀ ਦਰਿਆ ਦੇ ਪਾਰ ਦਾ ਹਿੱਸਾ ਜੰਮੂ-ਕਸ਼ਮੀਰ ਨਾਲ ਲੱਗਦਾ ਹੈ, ਜਿੱਥੇ ਪਾਕਿਸਤਾਨ ਨੇ ਲੰਘੀ ਸ਼ਾਮ ਜੰਗਬੰਦੀ ਦੀ ਉਲੰਘਣਾ ਕਰ ਕੇ ਗੋਲੀਬਾਰੀ ਕੀਤੀ ਸੀ। ਸ਼ਾਹਪੁਰਕੰਢੀ ਪੁਲੀਸ ਨੇ ਆਪਣੀ ਪੁਲੀਸ ਟੀਮ ਨਾਲ ਸਵੇਰ ਤੋਂ ਹੀ ਜੰਗਲਾਂ ਵਿੱਚ ਤਲਾਸ਼ੀ ਮੁਹਿੰਮ ਚਲਾਈ। ਪੁਲੀਸ ਨੇ ਵੀ ਤੁਰੰਤ ਰਾਵੀ ਦਰਿਆ ਦੇ ਕੰਢੇ ਜੰਗਲਾਂ ਵਿੱਚ ਤਲਾਸ਼ੀ ਮੁਹਿੰਮ ਸ਼ੁਰੂ ਕਰ ਦਿੱਤੀ।